हाम्रो बारेमा
मन्थली बचत तथा ऋण सहकारी संस्था लि.
वि.स. २०५४ साल माघ २० गते जिल्ला सहकारी कार्यालय काठमाडौंमा दर्ता भई
रामेछाप जिल्ला कार्यक्षेत्र रहेको वित्तीय संस्था हो । यो संस्था
कानूनी रुपमा दर्ता हुनु अघि २०५० सालमा तामाकोशी सेवा समितिका ११ जना
कर्मचारी एंव स्वंयसेवकहरुको प्रत्येकको रु. एक–एक हजार गरी जम्मा रु.
११,०००।– पूँजीबाट अनौपचारिक बचत समूहको रुपमा गठन भई संचालन भएको थियो
। प्रारम्भिक रुपमा गठित उक्त अनौपचारिक बचत समूह तामाकोशी सेवा
समितिद्वारा २०५४ सालमा संचालित जिल्लाव्यापी सहकारी अभियानको क्रममा
थप सदस्यहरुको सहभागितामा मन्थली बचत तथा ऋण सहकारी संस्थाको रुपमा
औपचारिक रुपमा दर्ता भएको सहकारी संस्था हो । थप नयाँ सदस्यहरुमा
अधिकांश तामाकोशी सेवा समितिका कर्मचारीहरु थिए । सहकारी संस्थाको रुपमा
दर्ताका लागि न्यूनतम २५ जना सदस्यहरु हुनुपर्ने प्रावधान रहेको थियो ।
मन्थली सहकारी संस्था रामेछाप जिल्लाको सदरमुकाम रहेको मन्थली नगरपालिका–१ मा अवस्थित छ । मन्थली सहकारी संस्था स्थापना हुँदाका बखत यसको कार्यक्षेत्र रामेछाप जिल्लाभरिको साविक ५५ वटै गाविसहरु रहेका थिए । नेपाल सरकारद्वारा स्थानीय तह पुनर्सरचना अनुसार उक्त साविक गाविसहरु हाल २ नगरपालिका (मन्थली नगरपालिका र रामेछाप नगरपालिका) तथा ६ गाउँपालिका (लिखु तामाकोशी गाउँपालिका, गोकुलगंगा गाउँपालिका, उमाकुण्ड गाउँपालिका, खाँडादेवी गाउँपालिका, सुनापति गाउँपालिका र दोरम्वा शैलुङ गाउँपालिका) कायम भएका छन् । यी सबै पालिकाहरु मन्थली सहकारीको कार्यक्षेत्र रहेका छन् । मन्थली साकोसको बाहय सेवा केन्द्रहरु रामेछाप बजार (रामेछाप नगरपालिका), गेलु (मन्थली नगरपालिका), धोवी (लिखु तामाकोशी गाउँपालिका) र सालू (मन्थली नगरपालिका) गरी ४ स्थानहरुमा रहेका छन् ।
मन्थली बचत तथा ऋण सहकारी संस्थाको प्रस्तावना बमोजिम मूलभूत उद्देश्य हो – सदस्यहरुको आर्थिक, सामाजिक, सांस्कृतिक एवं वातावरणीय समुन्नतिका लागि स्वनियन्त्रित संस्थाको रुपमा विकास गरी सदस्यहरुलाई नियमित रुपमा बचत गर्ने बानी बसाल्न उत्पे्ररित गरी संकलित रकमबाट उनीहरुकै इच्छा, चाहना र सीप अनुसार आयआर्जनका लागि ऋण प्रवाह गरी सदस्यहरुको जीवनस्तर उकास्ने कार्यहेतु आधुनिक प्रविधिको अवलम्वन गर्दै वित्तिय अनुशासन कायम राखी समुदायका सदस्यहरुलाई यथोचित लाभ प्रदान गरी सहकारी संस्कृतिको समुन्नयनमा समेत सहयोग पुरयाउने ।